پنجاب میں ٹورازم کا بے پناہ پوٹینشل ہے، مریم نواز

وزیراعلیٰ پنجاب مریم نواز شریف نے عالمی یومِ سیاحت کے موقع پر اپنے خصوص پیغام میں کہا ہے کہ پنجاب میں ٹورازم کا بے پناہ پوٹینشل موجود ہے اور صوبے میں سیاحت کے فروغ کے لیے تمام ممکنہ وسائل بروئے کار لائے جائیں گے۔ انہوں نے کہا کہ اللہ تعالیٰ نے پاکستان کو بے پناہ فطری و قدرتی خوبصورتی سے نوازا ہے اور پنجاب کا تاریخی، ثقافتی و مذہبی ورثہ دنیا بھر کے سیاحوں کے لیے خاص کشش رکھتا ہے۔ ان کا کہنا تھا کہ شنگھائی تعاون تنظیم (SCO) کی جانب سے رواں سال لاہور کو سیاحتی اور ثقافتی دارالحکومت قرار دیا جانا ایک انتہائی خوش آئند امر ہے جو عالمی سطح پر ملک کے مثبت تاثر کو اجاگر کرتا ہے۔

وزیراعلیٰ مریم نواز نے سیاحت کی ترقی کے لیے جاری منصوبوں کا تفصیل سے ذکر کرتے ہوئے بتایا کہ مری میں ‘گلاس ٹرین’ کا منصوبہ سیاحوں کے لیے ایک نئی اور دلکش جاذبیت پیدا کرے گا، جبکہ مری کے مال روڈ سمیت دیگر اہم سڑکوں کی تعمیر و توسیع کا کام تیزی سے جاری ہے۔ انہوں نے کہا کہ کوٹلی ستیاں بھی اب ایک نئے اور شاندار سیاحتی مقام کے طور پر ابھر رہا ہے۔ مریم نواز کا مزید کہنا تھا کہ صوبے میں مذہبی سیاحت اور تاریخی قلعوں کی بحالی کے لیے پائیدار اقدامات کیے جا رہے ہیں، جس سے معیشت کو استحکام ملے گا اور مقامی نوجوانوں کے لیے روزگار کے نئے اور وسیع مواقع پیدا ہوں گے۔