نواز شریف کی طرح جو وعدہ کروں گی پورا کروں گی: مریم نواز

وزیراعلیٰ پنجاب مریم نواز نے مظفرآباد میں ایک عظیم الشان انتخابی جلسے سے خطاب کرتے ہوئے کہا ہے کہ وہ نواز شریف کی روایت کو برقرار رکھتے ہوئے جو بھی وعدہ کریں گی، اسے پورا کر کے دکھائیں گی۔ انہوں نے کہا کہ وہ صرف وعدے کرنے نہیں بلکہ پنجاب کی دو سالہ کارکردگی کا عملی ریکارڈ لے کر کشمیری عوام کے سامنے آئی ہیں۔ انہوں نے اعلان کیا کہ آزاد کشمیر کے لیے 10 گرین الیکٹرک بسیں اور 15 موبائل ہسپتال تحفے کے طور پر لائے گئے ہیں، جبکہ کشمیری بچوں کو مفت تعلیم، معذور افراد کو ہمت کارڈ اور غریب خواتین کو مفت راشن بھی دیا جائے گا۔ سیاسی مخالفین پر تنقید کرتے ہوئے مریم نواز نے کہا کہ جن کے اپنے صوبوں کی سڑکیں ٹوٹی ہیں اور وسائل کرپشن کی نذر ہو جاتے ہیں، وہ آزاد کشمیر کے مسائل کیا حل کریں گے۔ انہوں نے عوام سے التماس کی کہ وہ ترقی و خوشحالی کے لیے مسلم لیگ (ن) کا ساتھ دیں۔