پنجاب میں تعلیمی اصلاحات کا بڑا پیکج، مفت گوگل کورسز کی منظوری

حکومت پنجاب اور عالمی ٹیکنالوجی کمپنی گوگل کے اشتراک سے صوبے کے طلبہ کے لیے بڑے تعلیمی ریلیف اور ترقیاتی پیکج کا اعلان کیا گیا ہے۔ وزیراعلیٰ مریم نواز شریف کی زیرِ صدارت لاہور میں منعقدہ ایک اعلیٰ سطحی اجلاس میں صوبے کے تعلیمی ڈھانچے کو جدید تقاضوں سے ہم آہنگ کرنے کے لیے انقلابی اقدامات کی منظوری دی گئی۔

اس شراکت داری کے تحت پنجاب کے ایک لاکھ سے زائد طلبہ کو گوگل کے تعاون سے سائبر سکیورٹی، آرٹیفیشل انٹیلیجنس (AI) اور بزنس انٹیلی جنس جیسے مہنگے سرٹیفکیشن کورسز مفت کروائے جائیں گے۔ ان عالمی معیار کے کورسز کی فیس عام طور پر 400 سے 1000 ڈالر تک ہوتی ہے، جو اب پنجاب کے طلبہ کے لیے بلا معاوضہ دستیاب ہوں گے۔ اس کے علاوہ وزیراعلیٰ نے 166 سرکاری کالجز میں جدید آئی ٹی لیبز کے قیام اور طلبہ کے لیے الیکٹرو بس سروس شروع کرنے کی بھی منظوری دی۔

تعلیمی اصلاحات کے ضمن میں “ہونہار سکالرشپ پروگرام” کے تحت ریکارڈ 62 ہزار 949 طلبہ کو وظائف دینے کا فیصلہ کیا گیا ہے۔ مزید برآں، لیپ ٹاپ سکیم کے دوسرے مرحلے میں خصوصی اور اقلیتی طلبہ کو بھی اوپن میرٹ پر شامل کرنے کی ہدایت دی گئی ہے۔ اجلاس میں پہلی بار تعلیمی اداروں، اساتذہ اور وائس چانسلرز کی کارکردگی جانچنے کے لیے باقاعدہ پیمانے (KPIs) مقرر کرنے کا بھی فیصلہ کیا گیا تاکہ نظام میں شفافیت اور بہتری لائی جا سکے۔