پنجاب حکومت کا “وزیراعلیٰ رحمت کارڈ” متعارف کرانے کا فیصلہ، بیواؤں کو ایک لاکھ روپے امداد دی جائے گی

پنجاب حکومت نے صوبے کی بیوہ خواتین اور یتیم بچوں کی باوقار کفالت کے لیے ایک انقلابی قدم اٹھاتے ہوئے ”وزیراعلیٰ پنجاب رحمت کارڈ“ متعارف کرانے کا فیصلہ کیا ہے۔ وزیراعلیٰ مریم نواز شریف نے اس منصوبے کی باقاعدہ منظوری دے دی ہے، جس کا بنیادی مقصد مستحق خاندانوں کو محض خیرات کے بجائے ریاست کی جانب سے ایک باوقار سرپرستی فراہم کرنا ہے۔

اس اسکیم کے تحت بیوہ خواتین کو ایک لاکھ روپے تک کی مالی امداد دی جائے گی، جبکہ یتیم بچوں کے لیے فی کس پچیس پچیس ہزار روپے کی رقم مختص کی گئی ہے۔ منصوبے کے پہلے مرحلے میں صوبے بھر کے 50 ہزار سے زائد بے آسرا گھرانوں کو اس ڈیجیٹل مالی امداد کے نیٹ ورک میں شامل کیا جائے گا، جس سے انہیں معاشی سہارا میسر آئے گا۔

پاکستان کی تاریخ میں پہلی بار بیواؤں اور یتیموں کی کفالت کے لیے ایک مکمل شفاف اور ڈیجیٹل نظام وضع کیا گیا ہے۔ رجسٹریشن کے عمل کو آسان بنانے کے لیے موبائل ایپلیکیشن، ویب پورٹل، کال سینٹر اور زکوٰۃ دفاتر کی سہولت فراہم کی جائے گی، جہاں سے مستحق افراد عید کے فوراً بعد اپنی درخواستیں جمع کرا سکیں گے۔

وزیراعلیٰ پنجاب مریم نواز شریف کا کہنا ہے کہ اس کارڈ کا مقصد خواتین کو مالی طور پر خود مختار بنانا اور انہیں خود روزگار کی راہ پر گامزن کرنا ہے۔ انہوں نے واضح کیا کہ بیوہ خواتین کو ان کا حق ان کی دہلیز پر پہنچایا جائے گا تاکہ وہ کسی کی محتاج نہ رہیں اور معاشرے میں سر اٹھا کر جی سکیں۔