وزیراعلیٰ پنجاب کا عید پر زائد کرایہ وصول کرنے پر کریک ڈاؤن کا حکم

مریم نواز شریف نے عید کے موقع پر زائد کرایہ وصول کرنے والوں کے خلاف سخت کریک ڈاؤن کا حکم دے دیا۔

وزیراعلیٰ نے تمام اضلاع میں مقررہ کرایوں پر عملدرآمد یقینی بنانے اور خلاف ورزی کرنے والوں کے خلاف فوری قانونی کارروائی کی ہدایت جاری کی۔انہوں نے ڈپٹی کمشنرز کو زائد کرایہ وصولی اور ٹکٹ بلیکنگ روکنے کے لیے سخت مانیٹرنگ کا حکم دیتے ہوئے تمام بس اسٹینڈز پر کرایہ نامے نمایاں آویزاں کرنے کی ہدایت کی۔مزید برآں، وزیراعلیٰ نے روزہ دار مسافروں کے لیے افطار کے انتظامات، بس اسٹینڈز پر صفائی ستھرائی، انتظار گاہوں میں بیٹھنے کے مناسب انتظام اور پنکھوں کی دستیابی یقینی بنانے کا بھی حکم دیا۔محکمہ ٹرانسپورٹ پنجاب اور دیگر متعلقہ اداروں کو فیلڈ میں مسلسل چیکنگ کی ہدایت کرتے ہوئے وزیراعلیٰ نے کہا کہ عید پر گھر جانے والے غریب مسافروں کے استحصال کی ہرگز اجازت نہیں دی جائے گی۔

انہوں نے واضح کیا کہ زائد کرایہ وصول کرنے والوں کے خلاف فوری اور سخت قانونی کارروائی عمل میں لائی جائے۔