مریم نواز سے چین کے نئے قونصل جنرل سن یان کی ملاقات، دوطرفہ تعاون پر زور

وزیراعلیٰ پنجاب مریم نواز شریف سے لاہور میں متعین چین کے نئے قونصل جنرل سن یان نے ملاقات کی، جس میں پاکستان اور چین کے درمیان سٹریٹجک شراکت داری اور دیرینہ مثالی دوستی کو مزید مستحکم کرنے کے عزم کا اعادہ کیا گیا۔

ملاقات کے دوران وزیراعلیٰ نے چین کی جانب سے دورے کی دعوت کو شکریہ کے ساتھ قبول کیا۔ انہوں نے سی پیک (CPEC) کے فروغ، دفاعی تعاون اور عالمی سطح پر کشیدگی کم کرنے میں چین کے کلیدی کردار کو سراہا۔ ملاقات میں پنجاب حکومت اور چینی قونصل خانے کے درمیان تجارت، انفراسٹرکچر، توانائی اور انفارمیشن ٹیکنالوجی کے شعبوں میں تعاون کو وسعت دینے پر اتفاق کیا گیا۔

مریم نواز شریف نے پنجاب میں صنعتی ترقی اور لاجسٹک کوریڈورز کے ذریعے معاشی اہداف کے حصول پر زور دیا، جبکہ چینی قونصل جنرل سن یان نے دونوں ممالک کے تعلقات کو باہمی احترام اور غیر متزلزل یکجہتی کی روشن مثال قرار دیا۔ انہوں نے یقین دلایا کہ چین پنجاب میں تکنیکی اور معاشی ترقی کے منصوبوں میں اپنا بھرپور تعاون جاری رکھے گا۔