پاکستان امریکا امن، اعتماد اور مشترکہ ترقی کے سفر میں ساتھ ہیں: مریم اورنگزیب

سینئر صوبائی وزیر پنجاب مریم اورنگزیب نے کہا ہے کہ پاکستان اور امریکا امن، باہمی اعتماد اور مشترکہ ترقی کے سفر میں ایک ساتھ آگے بڑھ رہے ہیں اور دونوں ممالک کے تعلقات وقت کے ساتھ مزید گہرے ہو رہے ہیں۔

امریکا کے 250ویں یومِ آزادی کے تاریخی موقع پر حضوری باغ لاہور میں منعقدہ ایک پروقار تقریب سے خطاب کرتے ہوئے مریم اورنگزیب نے امریکی حکومت اور وہاں کے عوام کو وزیراعلیٰ پنجاب مریم نواز شریف کی جانب سے مبارکباد پیش کی۔ انہوں نے اپنے خطاب میں واضح کیا کہ پاکستان اور امریکا کے تعلقات باہمی اعتماد، امن اور مشترکہ مفادات پر استوار ہیں، اور دونوں ممالک ٹیکنالوجی، سرمایہ کاری، موسمیاتی تبدیلی (کلائمیٹ چینج) اور سیاحت سمیت مختلف اہم شعبوں میں دوطرفہ تعاون کو تیزی سے فروغ دے رہے ہیں۔

سنیئر صوبائی وزیر کا کہنا تھا کہ حالیہ عرصے میں دونوں ممالک کے سفارتی و اقتصادی تعلقات مزید مضبوط ہوئے ہیں اور ان میں مثبت پیش رفت دیکھنے میں آئی ہے۔ انہوں نے کہا کہ دنیا نے کچھ عرصہ قبل سفارتکاری کی طاقت کا عملی مظاہرہ بھی دیکھا ہے جس سے خطے کے سیاسی منظر نامے پر مثبت اثرات مرتب ہوئے۔

مریم اورنگزیب نے مزید کہا کہ وزیراعظم شہباز شریف اور فیلڈ مارشل عاصم منیر نے عالمی امن کے قیام اور خطے میں استحکام کے فروغ کے لیے انتہائی اہم اور کلیدی کردار ادا کیا ہے۔ انہوں نے اس عزم کا اعادہ کیا کہ پاکستان ہمیشہ کی طرح امن، ترقی اور باہمی تعاون کی تعمیری پالیسی پر سختی سے کاربند ہے۔