صدر ٹرمپ اقوام متحدہ اجلاس میں ایرانی صدر سے ملاقات کیلئے تیار ہیں: روبیو

امریکی وزیر خارجہ مارکو روبیو نے اہم بیان دیتے ہوئے کہا ہے کہ صدر ڈونلڈ ٹرمپ اقوامِ متحدہ کے جنرل اسمبلی اجلاس کے موقع پر ایرانی حکام سمیت کسی بھی عالمی رہنما سے ملاقات کے لیے مکمل تیار ہیں۔ امریکی وزیر خارجہ نے وضاحت کی کہ فی الوقت صدر ٹرمپ اور ایرانی صدر مسعود پزشکیان کے درمیان کسی باضابطہ ملاقات کا شیڈول طے نہیں پایا ہے، تاہم امریکا ایرانی قیادت سے سفارتی بات چیت کا دروازہ کھلا رکھنے کا حامی ہے۔

مارکو روبیو نے خطے کی معاشی و جغرافیائی صورتحال پر روشنی ڈالتے ہوئے بتایا کہ کشیدگی کے باوجود آبنائے ہرمز (Strait of Hormuz) کے ذریعے عالمی مارکیٹ کے لیے تیل کی تقریباً 70 فیصد ترسیل بحال ہو چکی ہے اور اس اہم ترین بحری گزرگاہ سے گزرنے والے جہازوں کی تعداد میں روزانہ کی بنیاد پر اضافہ ہو رہا ہے۔ انہوں نے کہا کہ اس وقت اکثر تجارتی و معاشی بحری جہاز خطرے سے باہر ہیں اور ان پر حملے نہیں ہو رہے۔ امریکی وزیر خارجہ نے متنبہ بھی کیا کہ اگر ایران جوہری ہتھیار حاصل کرنے میں کامیاب ہو جاتا ہے تو اس سے عالمی مارکیٹ میں خام تیل کی قیمتیں بے تحاشا بڑھ جائیں گی۔