صدر زرداری سے ملائیشین وزیرِ داخلہ کی ملاقات، سکیورٹی و تجارتی تعاون بڑھانے پر اتفاق

ایوانِ صدر اسلام آباد میں صدرِ مملکت آصف علی زرداری سے ملائیشیا کے وزیرِ داخلہ سیف الدین نصوتیون بن اسماعیل نے ایک اعلیٰ سطحی وفد کے ساتھ ملاقات کی۔ اس ملاقات میں وفاقی وزیرِ داخلہ محسن نقوی بھی موجود تھے۔ گفتگو کے دوران دونوں ممالک کے درمیان انسدادِ دہشت گردی، قانون نافذ کرنے والے اداروں کے باہمی روابط، سیکیورٹی، منشیات کی روک تھام اور انسانی اسمگلنگ کے خلاف مشترکہ اقدامات کو مزید مضبوط بنانے پر کامل اتفاق کیا گیا۔

صدر آصف علی زرداری نے پاکستان اور ملائیشیا کے برادرانہ تعلقات کو باہمی احترام، مشترکہ مذہب اور ثقافت کی بنیادوں پر استوار قرار دیا۔ انہوں نے ملائیشیا کی مارکیٹ میں پاکستانی مصنوعات بالخصوص چاول، آلو، گندم، پولٹری اور جانوروں کی خوراک کی برآمدات بڑھانے اور مزید مارکیٹ رسائی دینے کی ضرورت پر زور دیا۔ ملاقات کے دوران ملائیشین وزیرِ داخلہ نے بتایا کہ سال 2026 دونوں ممالک کے سفارتی تعلقات کا 69واں سال ہے۔ اس موقع پر دوطرفہ پروازوں کا جائزہ بھی لیا گیا اور بتایا گیا کہ اس وقت دونوں ممالک کے درمیان ہفتہ وار 14 پروازیں چل رہی ہیں جن میں مزید اضافے کی کوششیں جاری ہیں۔