پی ٹی آئی ایم پی اے کی فائرنگ سے 2 لیویز اہلکار زخمی، مقدمہ درج: ذرائع

خیبر پختونخوا کے ضلع مالاکنڈ میں پاکستان تحریکِ انصاف (پی ٹی آئی) کے رکنِ صوبائی اسمبلی (ایم پی اے) شکیل خان اور ان کے گارڈز کی جانب سے فائرنگ کے نتیجے میں 2 لیویز اہلکار شدید زخمی ہو گئے۔ ذرائع کے مطابق واقعے کی ویڈیوز بھی سامنے آئی ہیں جن میں گارڈز کو لیویز اہلکاروں پر فائرنگ کرتے دیکھا جا سکتا ہے۔ واقعے کی سنگینی کو مدنظر رکھتے ہوئے اعلیٰ سطح پر اس کا سخت نوٹس لے لیا گیا ہے، جس کے بعد ایم پی اے شکیل خان اور دیگر نامزد افراد کے خلاف باقاعدہ ایف آئی آر (FIR) درج کر کے ان کی گرفتاری اور قانون کے مطابق کارروائی کا آغاز کر دیا گیا ہے۔

حکام کا کہنا ہے کہ لیویز اہلکاروں پر فائرنگ کے اس واقعے میں ملوث افراد کے خلاف ‘زیرو ٹالرنس’ پالیسی کے تحت بلا تفریق اور سخت ترین قانونی قدم اٹھایا جائے گا اور کسی قسم کی نرمی نہیں برتی جائے گی۔ واضح رہے کہ یہ افسوسناک واقعہ ایک ایسے وقت میں سامنے آیا ہے جب پی ٹی آئی کی جانب سے 27 ستمبر کو اسلام آباد کی طرف مارچ کا اعلان کیا گیا ہے اور پارٹی رہنماؤں کی جانب سے سخت بیانات کا سلسلہ بھی جاری ہے۔