جسٹس طارق جہانگیری ڈگری کیس میں بڑی پیش رفت

جسٹس طارق جہانگیری ڈگری کیس میں اہم پیش رفت سامنے آ گئی ہے۔ جسٹس طارق جہانگیری نے اسلام آباد ہائیکورٹ کی کارروائی کو وفاقی آئینی عدالت میں چیلنج کرنے کا فیصلہ کر لیا ہے، جبکہ اس سلسلے میں تین سینئر وکلا پر مشتمل قانونی ٹیم بھی تشکیل دے دی گئی ہے۔

قانونی ٹیم کے مطابق اکرم شیخ اور بیرسٹر صلاح الدین اسلام آباد ہائیکورٹ میں جسٹس طارق جہانگیری کی جانب سے کیس کی پیروی کریں گے، جبکہ عزیر بھنڈاری وفاقی آئینی عدالت میں جسٹس جہانگیری کی نمائندگی کرتے ہوئے کیس کی پیروی کریں گے۔ذرائع کے مطابق جسٹس طارق جہانگیری کی جانب سے کیس کو قابلِ سماعت قرار دینے کے فیصلے کو آج چیلنج کیا جائے گا۔ اس حوالے سے اسلام آباد ہائیکورٹ کے آرڈر کے خلاف وفاقی آئینی عدالت میں باقاعدہ اپیل دائر کی جائے گی۔مزید بتایا گیا ہے کہ جسٹس طارق جہانگیری کی جانب سے اسلام آباد ہائیکورٹ میں بھی مختلف درخواستیں دائر کی جائیں گی، جن میں قانونی نکات اور آئینی پہلوؤں کو اجاگر کیا جائے گا۔قانونی ماہرین کے مطابق اس پیش رفت کے بعد ڈگری کیس ایک نئے قانونی مرحلے میں داخل ہو گیا ہے، جس کے اثرات عدالتی اور آئینی سطح پر نمایاں ہو سکتے ہیں۔