ملک کی موجودہ صورتحال پر قومی یکجہتی کی ذمہ داری اقتدار والوں پر ہے، میجر (ر) فیض احمد فیض

راولپنڈی میں پی ٹی آئی رہنما میجر (ر) فیض احمد فیض نے میڈیا سے گفتگو کرتے ہوئے کہا کہ وہ بانی پی ٹی آئی سے ملاقات کے لیے اڈیالہ جیل کے گیٹ نمبر پانچ سے اندر داخل ہوئے۔

انہوں نے بتایا کہ جیل کے اندرونی حصے تک پہنچنے سے پہلے چھ مختلف مقامات پر چیکنگ کی گئی اور ملاقات سے قبل ان کے ہاتھ پر مہر بھی لگائی گئی۔ میجر فیض احمد فیض نے میڈیا کو مہر دکھاتے ہوئے کہا کہ یہ اصل مہر ہے اور ان کی مکمل تلاشی اور چھان بین کی گئی۔

انہوں نے مزید بتایا کہ وہ تقریباً دو گھنٹے جیل کے اندر رہے۔

اس موقع پر ایک صحافی نے سوال کیا کہ موجودہ ملکی صورتحال میں کیا قومی یکجہتی کا مظاہرہ نہیں ہونا چاہیے؟ جس پر میجر (ر) فیض احمد فیض نے کہا کہ یہ اچھا سوال ہے، مگر یہ ان لوگوں سے پوچھیں جو اقتدار میں بیٹھے ہیں کہ وہ ملک کو کس سمت لے کر جا رہے ہیں۔