اداکارہ ماہرہ خان کا تیزاب حملے پر شدید ردعمل، مردوں سے بھی آواز بلند کرنے کا مطالبہ

پاکستانی اداکارہ ماہرہ خان نے کوئٹہ میں لیڈی ڈاکٹر پر تیزاب پھینکنے کے واقعے پر شدید برہمی کا اظہار کیا ہے اور اس واقعے کو وحشیانہ اور افسوسناک قرار دیا ہے۔

انہوں نے سوشل میڈیا پر جاری پیغام میں کہا کہ ایک خاتون جانیں بچانے کے لیے اسپتال گئی تھی مگر اس کے چہرے پر تیزاب پھینک دیا گیا، جو ناقابلِ تصور اور انتہائی ظالمانہ عمل ہے۔

ماہرہ خان نے لکھا کہ ڈاکٹر ماہ نور پر اسپتال میں حملہ کیا گیا، جس کے باعث وہ شدید متاثر ہوئی ہیں۔ ان کے مطابق یہ عمل انسانیت کے خلاف ہے اور ایسا سوچنا بھی خوفناک ہے کہ کوئی شخص کسی کو اس طرح نقصان پہنچانے کا حق سمجھ سکتا ہے۔

اداکارہ نے مزید کہا کہ یہ وقت صرف خواتین کے لیے نہیں بلکہ مردوں کے لیے بھی ہے کہ وہ اس ظلم کے خلاف آواز بلند کریں اور بھرپور احتجاج کریں۔