وزیراعظم ہاؤس میں پاکستان،سری لنکا اور زمبابوے کی ٹیموں کے اعزاز میں ظہرانہ

اسلام آباد: وزیراعظم محمد شہباز شریف نے وزیراعظم ہاؤس میں پاکستان میں ہونے والی ٹرائی نیشن سیریز میں شریک پاکستان، سری لنکا اور زمبابوے کی کرکٹ ٹیموں کے اعزاز میں ظہرانہ دیا۔

وزیراعظم نے کھلاڑیوں کی مہارت، جذبے اور لگن کو قابلِ ستائش قرار دیتے ہوئے کہا کہ تمام کھلاڑی اپنے اپنے ملک کی بہترین نمائندگی کر رہے ہیں۔ انہوں نے اس بات پر زور دیا کہ میچز میں کھلاڑیوں کا اسپورٹس مین اسپرٹ اور باہمی احترام نوجوان نسل کے لیے مشعلِ راہ ہے۔

وزیراعظم نے پی سی بی کے چیئرمین محسن رضا نقوی کی قیادت میں سیریز کے تمام میچز کے بہترین انتظامات، مؤثر حکمت عملی اور اعلیٰ پیشہ ورانہ مہارت کو سراہا۔ انہوں نے کہا کہ پاکستان میں بین الاقوامی کرکٹ کا مسلسل انعقاد ملک کے مثبت تشخص اور امن و استحکام کا ثبوت ہے۔

وزیراعظم نے کہا کہ ملک میں جاری ٹرائی نیشن سیریز سے کرکٹ کے شائقین کو اعلیٰ درجے کا کھیل دیکھنے کو ملے گا اور امید ہے کہ تینوں ممالک کے درمیان کرکٹ کے ذریعے دوستی اور باہمی تعاون مزید مضبوط ہوگا۔ انہوں نے اس بات کا اعادہ کیا کہ پاکستان آئندہ بھی دنیا بھر کی ٹیموں کی میزبانی اسی طرح کرتا رہے گا۔

ظہرانے میں وزیر اعلیٰ سندھ سید مراد علی شاہ، وزیر داخلہ و چیئرمین پی سی بی سید محسن رضا نقوی، وفاقی وزیر اطلاعات و نشریات عطا اللہ تارڑ، وفاقی وزیر ریلویز محمد حنیف عباسی، سری لنکن ہائی کمشنر ریئر ایڈمرل فریڈ سینیویراتھنے اور زمبابوے کے ہائی کمشنر ٹائیٹس ابو بسوتو بھی شریک تھے