دنیا بھر کی طرح پاکستان میں کرسمس کی تقریبات،گرجا گھروں میں خصوصی عبادات کا اہتمام

پاکستان سمیت دنیا بھر میں مسیحی برادری آج کرسمس کا تہوار مذہبی جوش و جذبے سے منا رہی ہے۔ ملک کے مختلف شہروں میں خصوصی عبادات اور دعائیہ تقریبات کا انعقاد کیا گیا۔

کراچی، لاہور اور اسلام آباد سمیت بڑے شہروں میں گرجا گھروں کو سجا دیا گیا جہاں بڑی تعداد میں مسیحی برادری نے شرکت کی۔ کرسمس شاپنگ اور عبادات کا سلسلہ جاری رہا جبکہ سکیورٹی کے سخت انتظامات کیے گئے۔

صدر مملکت آصف علی زرداری اور وزیراعظم شہباز شریف نے مسیحی برادری کو کرسمس کی دلی مبارکباد دی۔ صدر مملکت نے کہا کہ کرسمس امید، امن اور ہمدردی کا پیغام دیتا ہے۔ وزیراعظم نے مسیحی برادری کے قومی ترقی اور دہشت گردی کے خلاف جدوجہد میں کردار کو سراہا۔

افواجِ پاکستان نے بھی مسیحی برادری کو کرسمس کی مبارکباد دیتے ہوئے ان کی خدمات کو خراجِ تحسین پیش کیا۔