سرگودھا دربار قتلِ عام کیس: چار مجرموں کی 20،20 بار سزائے موت برقرار

لاہور ہائیکورٹ نے سرگودھا کے دربار پر گدی نشینی کے تنازع پر 20 افراد کو بے دردی سے قتل کرنے کے کیس میں 4 مجرمان کی اپیلیں مسترد کرتے ہوئے ان کی 20 بار سزائے موت کا فیصلہ برقرار رکھا ہے۔ جسٹس شہباز رضوی کی سربراہی میں دو رکنی بینچ نے 25 صفحات پر مشتمل تفصیلی فیصلے میں قرار دیا کہ مجرمان نے مقتولین کو نشہ آور مشروب پلا کر بے ہوش کیا اور برہنہ کر کے انتہائی سفاکی و تشدد سے قتل کیا۔ عدالت عالیہ نے وضاحت کی کہ ڈی این اے، طبی، فرانزک شواہد اور زخمی عینی شاہدین کے بیانات سے جرم بلا شبہ ثابت ہوا ہے۔ واضح رہے کہ تھانہ صدر سرگودھا میں 2 اپریل 2017 کو درج مقدمے میں انسدادِ دہشت گردی عدالت نے 3 دسمبر 2019 کو مجرمان کو سزائے موت سنائی تھی۔