ماضی سے سبق نہ سیکھنے والی قومیں مٹ جاتی ہیں، ملک صرف اشرافیہ کا بن کر رہ گیا،سردار لطیف کھوسہ

پاکستان تحریکِ انصاف کے رہنما سردار لطیف کھوسہ اور معروف سیاسی تجزیہ کار زبیر عمر نے ملک کی موجودہ سیاسی و اقتصادی صورتحال پر شدید تشویش کا اظہار کیا ہے۔ سردار لطیف کھوسہ نے تاریخ کا حوالہ دیتے ہوئے متنبہ کیا کہ جو قومیں ماضی سے سبق نہیں سیکھتیں وہ مٹ جاتی ہیں۔ انہوں نے کہا کہ ماضی میں یحییٰ خان نے بنگالیوں کو کیڑے مکوڑے کہا تھا اور آج بلوچوں کو دہشت گرد کہا جا رہا ہے، حالانکہ بلوچ ایک انتہائی غیرت مند قوم ہے جس کی خواتین اگر میدان میں دوپٹہ پھینک دیں تو جنگیں رک جاتی تھیں۔ انہوں نے اپوزیشن رہنماؤں کے ساتھ ناروا سلوک کی مذمت کرتے ہوئے انکشاف کیا کہ ڈاکٹر یاسمین راشد کو مختلف مقدمات میں 250 سال، اپوزیشن لیڈر قومی اسمبلی عمر ایوب کو 50 سال اور اپوزیشن لیڈر سینیٹ شبلی فراز کو سزائیں سنا کر نااہل کر دیا گیا ہے۔ دوسری جانب زبیر عمر نے ملک کے حالات کو بدترین قرار دیتے ہوئے کہا کہ گزشتہ چار سالوں میں مہنگائی میں ہولناک اضافہ ہوا ہے۔ ان کا کہنا تھا کہ حکومت کو سوا چار سال کا طویل عرصہ ملنے کے باوجود کوئی ترقی نہیں ہوئی، پاکستان کے افغانستان کے ساتھ تعلقات خراب ہیں جبکہ امریکہ اور بھارت کے مراسم مضبوط ہو رہے ہیں، جس کی وجہ سے آج بھارت اور ویتنام ہم سے بہت آگے نکل چکے ہیں۔ انہوں نے افسوس کا اظہار کیا کہ یہ ملک اب صرف اشرافیہ کے لیے رہ گیا ہے اور عام یا کم پڑھا لکھا آدمی بے یار و مددگار ہے۔