بہاولنگر: معمولی تلخ کلامی پر 3 افراد کے وحشیانہ تشدد سے زمیندار جاں بحق

بہاولنگر میں فورٹ عباس کے قریب معمولی تلخ کلامی پر 3 افراد کے وحشیانہ تشدد کے نتیجے میں ایک زمیندار جاں بحق ہو گیا ہے۔ پولیس حکام کے مطابق، 58 سالہ مقتول کی شناخت شوکت علی کے نام سے ہوئی ہے، جو اپنے بیٹے کے ہمراہ ایک ہوٹل سے کھانا کھا کر نکل رہا تھا کہ ملزمان نے تلخ کلامی پر اسے دھکے مار کر زمین پر گرا دیا اور بہیمانہ تشدد کا نشانہ بنایا۔ واقعے کی اطلاع ملتے ہی پولیس کی بھاری نفری اور امدادی ٹیمیں فوراً موقع پر پہنچ گئیں اور لاش کو پوسٹ مارٹم کے لیے اسپتال منتقل کیا۔ مقتول کے بیٹے کی مدعیت میں 3 افراد کے خلاف باقاعدہ مقدمہ درج کر کے قانونی کارروائی کا آغاز کر دیا گیا ہے۔ پولیس کا کہنا ہے کہ ملزمان واردات کے بعد موقع سے فرار ہونے میں کامیاب ہو گئے، جن کی گرفتاری کے لیے خصوصی ٹیمیں تشکیل دے دی گئی ہیں اور انہیں جلد ہی حراست میں لے لیا جائے گا۔