طالبہ لائبہ خود کشی کیس میں اہم پیش رفت، ایف آئی اے میں مقدمہ درج

وفاقی دارالحکومت میں طالبہ لائبہ اعجاز کے مبینہ خودکشی واقعے میں بڑی پیش رفت سامنے آئی ہے، جہاں وفاقی تحقیقاتی ادارے (ایف آئی اے) کے اینٹی ہیومن ٹریفکنگ سرکل نے ویزا اور اسالرشپ فراڈ میں ملوث 2 نامزد ملزمان کے خلاف باقاعدہ مقدمہ درج کر لیا ہے۔ ایف آئی اے کے مطابق ملزم محمد نعمان اور اس کی ساتھی فاطمہ سرور نے متاثرہ طالبہ کو امریکہ کا ویزا اور اسکالرشپ دلوانے کا جھانسہ دے کر 93 لاکھ روپے کی خطیر رقم ہتھیا لی۔

تحقیقاتی رپورٹ کے مطابق ملزمان نے متاثرہ خاندان کا اعتماد حاصل کرنے کے لیے جعلی اسکالرشپ لیٹرز، یونیورسٹی ایڈمیشن آفرفارم اور فیسوں کی جعلی رسیدیں تیار کر کے پیش کیں۔ رقم میں سے 29 لاکھ روپے لائبہ اعجاز کے بینک اکاؤنٹ کے ذریعے منتقل کیے گئے جبکہ بقایا رقم نقد وصول کی گئی۔ ایف آئی اے ایف آئی آر کے متن میں تحریر ہے کہ اس بدترین مالیاتی دھوکہ دہی اور مسلسل ذہنی اذیت و صدمے کے باعث طالبہ لائبہ اعجاز انتقال کر گئیں۔ ایف آئی اے نے دونوں ملزمان کے خلاف تعزیراتِ پاکستان کی دفعات 419، 420، 109 اور امیگریشن آرڈیننس کے تحت کارروائی کا آغاز کر دیا ہے۔