لاہور: پی کے ایل آئی میں روبوٹک ٹیکنالوجی سے لبلبے کے کینسر کا کامیاب آپریشن

لاہور میں قائم پاکستان کڈنی اینڈ لیور انسٹیٹیوٹ اینڈ ریسرچ سینٹر (پی کے ایل آئی) میں روبوٹک ٹیکنالوجی کے ذریعے لبلبے کے کینسر کی کامیاب سرجری کرلی گئی، جسے ملک میں جدید طبی سہولیات کی جانب اہم سنگ میل قرار دیا جا رہا ہے۔

ادارے کے ڈین ڈاکٹر فیصل سعود ڈار نے بتایا کہ پی کے ایل آئی میں 500 سے زائد روبوٹک سرجریز مکمل کی جاچکی ہیں۔ ان کے مطابق روبوٹ کی مدد سے بڑے اور پیچیدہ آپریشن کم تکلیف دہ طریقے سے چھوٹے چیروں کے ذریعے انجام دیے جا رہے ہیں، جس سے مریض جلد صحت یاب ہوتے ہیں۔

انہوں نے مزید بتایا کہ جگر کے کینسر کی پیچیدہ سرجری بھی اسی جدید طریقہ کار سے کی گئی ہے، جس کے نتائج حوصلہ افزا رہے۔

ڈاکٹر فیصل سعود ڈار کا کہنا تھا کہ پی کے ایل آئی جدید اعضا کی پیوندکاری اور کینسر سرجری کے میدان میں نمایاں مقام حاصل کر رہا ہے۔

طبی ماہرین کے مطابق لبلبے اور جگر کے کینسر کا بروقت اور مؤثر علاج مریض کی زندگی بچانے میں کلیدی کردار ادا کرتا ہے۔