روٹی کی قیمت پر حکومت اور نان روٹی ایسوسی ایشن میں ڈیڈ لاک، 25 روپے کرنے کا اعلان

روٹی کی سرکاری قیمت کے معاملے پر حکومت اور متحدہ نان روٹی ایسوسی ایشن کے درمیان ایک بار پھر شدید ڈیڈ لاک پیدا ہو گیا ہے۔ ایسوسی ایشن نے خبردار کیا ہے کہ اگر حکومت نے ان کے مطالبات تسلیم نہ کیے تو وہ روٹی کی قیمت خود مختار طور پر 25 روپے مقرر کرنے پر مجبور ہوں گے۔

متحدہ نان روٹی ایسوسی ایشن ڈسٹرکٹ لاہور کے اہم اجلاس کے بعد جاری کردہ اعلامیے میں کہا گیا ہے کہ اوپن مارکیٹ میں آٹے کی قیمت میں مسلسل اور بے پناہ اضافے کے باعث تندور مالکان شدید مالی مشکلات کا شکار ہو چکے ہیں۔ آٹے کی بوری مہنگی ہونے اور دیگر اخراجات بڑھنے سے روٹی کی پیداواری لاگت (پروڈکشن کاسٹ) میں نمایاں اضافہ ہو چکا ہے، جس کی وجہ سے موجودہ سرکاری نرخ پر روٹی فروخت کرنا اب ممکن نہیں رہا۔ ایسوسی ایشن کا کہنا ہے کہ موجودہ قیمت پر روٹی بیچنے سے تندور مالکان کو کاروبار جاری رکھنے میں بھاری مالی نقصان اٹھانا پڑ رہا ہے۔

بیان میں مزید کہا گیا کہ متعلقہ سرکاری حکام کو متعدد بار اس سنگین صورتحال سے آگاہ کیا گیا، لیکن تاحال مسئلے کے حل کے لیے کوئی مؤثر اقدام نہیں کیا گیا۔ نان روٹی ایسوسی ایشن نے حکومت سے پرزور مطالبہ کیا ہے کہ موجودہ آٹے کی قیمت اور پیداواری لاگت کو مدنظر رکھتے ہوئے روٹی کی قیمت کا ازسرنو تعین کیا جائے اور سرکاری نرخوں پر فوری نظرثانی کی جائے۔ ایسوسی ایشن نے الٹی میٹم دیا ہے کہ اگر ان کی شنوائی نہ ہوئی تو وہ روٹی کی قیمت 25 روپے کرنے، تندور بند کرنے اور ملک گیر احتجاجی لائحہ عمل اختیار کرنے پر مجبور ہوں گے۔