بانی پی ٹی آئی کی بہنوں کو جیل میں سہولیات بارے رپورٹ طلب

لاہور ہائیکورٹ نے بانی پاکستان تحریکِ انصاف (پی ٹی آئی) کی بہنوں کی نظر بندی اور جیل میں بنیادی سہولیات کی فراہمی سے متعلق دائر درخواستوں پر سماعت کرتے ہوئے علیمہ خان کی نظر بندی کے خلاف درخواست نمٹا دی ہے۔ ہائیکورٹ کے جسٹس عبہر گل خان نے علیمہ خان کے بیٹے شاہ ریز اور عظمیٰ خان کی بیٹی سکینہ بی بی کی درخواستوں پر سماعت کی، جہاں سرکاری وکیل نے ہوم ڈیپارٹمنٹ میں علیمہ خان کی نظر بندی کے خلاف درخواست زیرِ التوا ہونے کی رپورٹ جمع کرائی۔

سماعت کے دوران عدالت نے نورین نیازی اور عظمیٰ خان کو جیل میں ادویات، کپڑے اور کتابیں سمیت ضروری بنیادی سہولیات کی فراہمی کے لیے باقاعدہ فہرست طلب کرتے ہوئے ہوم ڈیپارٹمنٹ اور جیل حکام سے 12 اکتوبر تک تفصیلی رپورٹ طلب کر لی۔ جسٹس عبہر گل خان نے واضح کیا کہ قیدیوں کو باہر کا کھانا لانے کی اجازت نہیں دی جا سکتی، البتہ عدالتی حکم کے مطابق درکار ضروری اشیا جیل کے اندر بھیجی جائیں گی۔ دوسری جانب، عدالتی کارروائی کے بعد پی ٹی آئی کے سیکرٹری جنرل سلمان اکرم راجہ نے میڈیا سے گفتگو کرتے ہوئے کہا کہ ان کی جماعت کسی بے اصولی معاہدے کا حصہ نہیں بنے گی اور عوام کے حقوق و تحفظ پر کوئی سمجھوتا نہیں کیا جائے گا۔