باغوں کا شہر کنکریٹ کا جنگل بن گیا، لاہور کا گرین ایریا خطرناک حد تک سکڑ گیا

باغوں کا تاریخی شہر لاہور مسلسل پھیلتی تعمیرات اور سڑکوں کی توسیع کے باعث کنکریٹ کا جنگل بن چکا ہے، جہاں گرین ایریا خطرناک حد تک سکڑنے سے درجہ حرارت، سموگ اور ماحولیاتی مسائل میں بے پناہ اضافہ ہوا ہے جبکہ پرندوں کی کئی نایاب اقسام بھی کم ہو گئی ہیں۔

اربن یونٹ (Urban Unit) کی سائنسی اسٹڈی کے مطابق 2007ء سے 2015ء کے دوران لاہور میں درختوں کی تعداد میں 72 فیصد کمی ریکارڈ کی گئی۔ 2019ء تک شہر کا تقریباً 40 فیصد رقبہ کنکریٹ کی تعمیرات کی نذر ہو چکا تھا، جس کے بعد اب گھنا سبزہ 35 مربع کلومیٹر سے گھٹ کر صرف 19 مربع کلومیٹر رہ گیا ہے۔ شہر کے کل رقبے میں پارکس کا تناسب صرف 1.4 فیصد ہے، جو عالمی معیارات سے تین گنا کم ہے۔ عالمی معیار کے مطابق فی 1,000 افراد 0.9 ہیکٹر گرین اسپیس ہونی چاہیے، لیکن لاہور میں یہ شرح محض 0.2 ہیکٹر ہے۔

ماہرینِ ماحولیات نے تنبیہ کی ہے کہ فیروز پور روڈ، جی ٹی روڈ اور رائیونڈ روڈ پر زرعی زمینوں کی کمرشلائزیشن نے لاہور کی قدرتی فضا کو برباد کر دیا ہے۔ اگر فوری بنیادوں پر مؤثر شجرکاری، گرین اسپیسز کے تحفظ اور ماحولیاتی پالیسیوں پر عملدرآمد نہ کیا گیا تو آنے والی نسلوں کے لیے صاف ہوا میں سانس لینا ناممکن ہو جائے گا۔