لاہور میں مون سون کی پہلی موسلا دھار بارش، موسم خوشگوار

صوبائی دارالحکومت کے مختلف علاقوں میں مون سون کی پہلی موسلا دھار بارش کے باعث گرمی کا زور ٹوٹ گیا اور موسم انتہائی خوشگوار ہو گیا، جس سے شہریوں کے چہرے کھل اٹھے۔

محکمہ موسمیات کی جانب سے جاری کردہ اعداد و شمار کے مطابق، شہر کے مختلف حصوں میں وقفے وقفے سے ہونے والی بارش کی مقدار درج ذیل رہی , جیل روڈ پر 2 ملی میٹر، ایئرپورٹ پر 1.5 ملی میٹر، گلبرگ میں 2.4 ملی میٹر، لکشمی چوک میں 5.4 ملی میٹر اور اپر مال میں 1 ملی میٹر بارش ریکارڈ کی گئی۔  تاجپورہ میں 4.6 ملی میٹر، نشتر ٹاؤن میں 8.4 ملی میٹر، پانی والا تالاب میں 6.8 ملی میٹر، جبکہ سب سے زیادہ بارش فرخ آباد میں 19.8 ملی میٹر ریکارڈ کی گئی۔ گلشن راوی میں 0.8 ملی میٹر، اقبال ٹاؤن میں 3.4 ملی میٹر، سمن آباد میں 2.8 ملی میٹر اور جوہر ٹاؤن میں 6.6 ملی میٹر بارش ریکارڈ ہوئی۔

محکمہ موسمیات کے مطابق، اس پہلے اسپیل کے دوران شہر میں مجموعی طور پر اوسطاً 3.6 ملی میٹر بارش ریکارڈ کی گئی ہے۔ موسم کی تبدیلی کے بعد ٹھنڈی ہوائیں چلنے سے حبس کا خاتمہ ہو گیا ہے، تاہم بعض نشیبی علاقوں میں پانی جمع ہونے سے شہریوں کو آمدورفت میں مشکلات کا سامنا بھی کرنا پڑ رہا ہے۔