لاہور: ڈیفنس سی میں آذربائیجان کی غیر ملکی خاتون سے مبینہ اجتماعی زیادتی، مقدمہ درج

لاہور کے پوش علاقے ڈیفنس سی میں آذربائیجان سے تعلق رکھنے والی 20 سالہ غیر ملکی خاتون ڈیانا کے ساتھ مبینہ اجتماعی زیادتی کا انتہائی افسوسناک واقعہ سامنے آیا ہے، جس پر پولیس نے کارروائی کرتے ہوئے مقدمہ درج کر لیا ہے۔ پولیس کے مطابق متاثرہ خاتون چند روز قبل ہی لاہور پہنچی تھی، جہاں اسے دو نامعلوم لڑکیاں ورغلا کر مقامی کیفے لے گئیں، جہاں تین مرد پہلے سے موجود تھے۔

کیفے میں وقت گزارنے کے بعد ملزمان غیر ملکی لڑکی کو ایک فلیٹ پر لے گئے، جہاں اسے نشہ آور چیز پلا کر تینوں افراد نے مبینہ طور پر اجتماعی زیادتی کا نشانہ بنایا۔ پولیس کا کہنا ہے کہ ملزمان رات بھر لڑکی کو جنسی حواس کا نشانہ بنانے کے بعد ایئرپورٹ کے قریب ویران جگہ پر چھوڑ کر فرار ہو گئے۔ واقعے کا علم ہوتے ہی لاہور پولیس نے ملزمان کی گرفتاری کے لیے مختلف ٹیمیں تشکیل دے کر سائنسی و تفتیشی بنیادوں پر تحقیقات کا آغاز کر دیا ہے۔