مبینہ زیادتی کیس: غیر ملکی خاتون بیان ریکارڈ کرانے کیلئے پیر کو عدالت طلب

لاہور کی کینٹ کچہری میں آذربائیجان سے تعلق رکھنے والی ایک غیر ملکی خاتون کے ساتھ مبینہ زبردستی اور زیادتی کے مقدمے کی سماعت ہوئی، جہاں عدالت نے خاتون کا بیان قلمبند کرنے کے لیے تاریخ مقرر کر دی ہے۔ پولیس کے مطابق متاثرہ خاتون نے اس حوالے سے تھانہ ڈیفنس سی میں مقدمہ درج کروایا تھا۔

غیر ملکی خاتون کو ڈیوٹی مجسٹریٹ ارم یوسف کے روبرو پیش کیا گیا، تاہم عدالت نے ریمارکس دیے کہ چونکہ آج ملک بھر میں عام تعطیل ہے، اس لیے جسمانی ریمانڈ کے امور کے علاوہ کسی بھی دوسری فائل پر باضابطہ سماعت نہیں کی جا سکتی۔ عدالت نے حکم دیا کہ متاثرہ خاتون کا ابتدائی بیان ضابطہ فوجداری کی دفعہ 164 کے تحت ریکارڈ کرنے کے لیے اسے 28 ستمبر کو متعلقہ علاقہ مجسٹریٹ کے سامنے پیش کیا جائے۔

دوسری جانب، عدالت نے تفتیشی افسر کو ہدایت کی ہے کہ وہ اس مقدمے میں نامزد ملزمان کی تلاش تیز کریں اور جیسے ہی ملزمان دستیاب ہوں، انہیں باضابطہ طور پر نوٹس جاری کیے جائیں تاکہ قانون کے مطابق تفتیش کو آگے بڑھایا جا سکے۔