لاہور میں بسنت کی تیاریاں عروج پر، ایک ارب سے زائد مالیت کی ڈور اور پتنگیں فروخت

سیف کائٹ فلائنگ ایسوسی ایشن نے اعلان کیا ہے کہ لاہور میں بسنت کی خرید و فروخت میں ایک ارب سے زائد کی ڈور اور پتنگیں فروخت ہو چکی ہیں۔ ایسوسی ایشن کے لیگل ایڈوائزر ملک فیضان احمد کے مطابق، بسنت سے قبل مجموعی فروخت ڈیڑھ ارب روپے سے تجاوز کر جائے گی اور مارکیٹس میں ڈور اور پتنگوں کی طلب میں اضافہ جاری ہے۔

انہوں نے بتایا کہ چوتھے روز 10 لاکھ گڈے اور 20 ہزار سے زائد پنے فروخت ہوئے، جبکہ پون تاوا 250 روپے، ایک تاوا 450-500 روپے اور ڈیڑھ تاوا 700-800 روپے میں فروخت ہو رہا ہے۔ پہلے چار دنوں میں مجموعی خرید و فروخت 122 کروڑ روپے سے زائد رہی۔

ملک فیضان نے کہا کہ اندرون موچی گیٹ، اسلام پورہ، ساندہ، سمن آباد، نوناریاں اور اچھرہ میں خرید و فروخت جاری ہے اور شہری دیگر شہروں سے مال کی آمد کے منتظر ہیں۔ حکومت پنجاب نے 6 فروری کو بسنت کے جشن کے لیے عام تعطیل کا اعلان کیا ہے، جبکہ وزیراعلیٰ مریم نواز نے 7 فروری کو لبرٹی چوک میں عوام کو بسنت منانے کی دعوت دی ہے۔