یورپ میں منجمد روسی اثاثے امریکی کنٹرول میں دینے کی کوششوں سے لاعلم ہیں: کریملن

روس کے ایوانِ صدارت (کریملن) نے واضح کیا ہے کہ یورپ میں منجمد روسی اثاثوں کو غیر منجمد کر کے امریکی کنٹرول میں منتقل کرنے کی مبینہ بین الاقوامی کوششوں سے متعلق ماسکو کو باضابطہ طور پر کوئی معلومات حاصل نہیں ہیں۔

کریملن کے ترجمان دیمتری پیسکوف نے صحافیوں کو بریفنگ دیتے ہوئے کہا کہ روس اس قسم کے کسی منصوبے سے مکمل طور پر لاعلم ہے اور میڈیا میں گردش کرنے والی خبروں کی سچائی کی تصدیق نہیں کی جا سکتی۔ انہوں نے اشارہ دیا کہ یہ معاملہ امریکا اور یورپی ممالک کے درمیان دوطرفہ مذاکرات کا حصہ ہو سکتا ہے، لیکن روس کو اس عمل میں شامل نہیں کیا گیا۔

واضح رہے کہ برطانوی اخبار فنانشل ٹائمز نے دعویٰ کیا تھا کہ امریکی حکام نے میامی میں ایک ملاقات کے دوران یورپ میں منجمد روسی اثاثوں کی منتقلی اور انہیں امریکی کنٹرول میں دینے کی تجویز دی تھی تاکہ یوکرین تنازع کے حل میں پیش رفت کی جا سکے، تاہم یورپی یونین کے نمائندوں نے اس تجویز کو مبینہ طور پر رد کر دیا۔ کریملن نے ان تمام رپورٹوں کو فی الحال غیر تصدیق شدہ قرار دیا ہے۔