خیبر پختونخوا پولیس کی ہنگامہ آرائی، احتجاج سے نمٹنے کیلئے آپریشنل ہدایات جاری

خیبر پختونخوا پولیس نے صوبے بھر میں ممکنہ ہنگامہ آرائی، توڑ پھوڑ اور احتجاجی مظاہروں کے دوران امن و امان کی صورتِ حال کو قابو میں رکھنے اور شہریوں کی تحفظ کے لیے باقاعدہ تحریری آپریشنل ہدایات جاری کر دی ہیں۔ جاری کردہ اعلامیے میں واضح کیا گیا ہے کہ امن و امان میں خلل ڈالنے، سرکاری یا نجی املاک کو نقصان پہنچانے، سیکیورٹی فورسز پر حملے کرنے اور شہریوں کی جان و مال کو خطرے میں ڈالنے والے عناصر کے خلاف بلا امتیاز سخت قانونی کارروائی عمل میں لائی جائے گی۔

آپریشنل ہدایات کے تحت تمام پولیس اسٹیشنز، سرکاری عمارتوں، بینکوں، پیٹرول پمپس، تجارتی مراکز اور اہم شاہراہوں کی سیکیورٹی سخت کرنے کے لیے خصوصی نفری تعینات کر دی گئی ہے۔ پولیس حکام نے انتباہ جاری کیا ہے کہ تمام مظاہروں اور احتجاجی سرگرمیوں کی ویڈیو ریکارڈنگ کی جائے گی تاکہ توڑ پھوڑ یا پُرتشدد واقعات میں ملوث شرپسندوں کے خلاف ٹھوس شواہد کے ساتھ قانونی چارہ جوئی کی جا سکے۔ خیبر پختونخوا پولیس نے شہریوں سے پرامن رہنے اور کسی بھی غیر قانونی اجتماع یا اشتعال انگیزی کا حصہ نہ بننے کی اپیل کرتے ہوئے کہا ہے کہ ضلعی انتظامیہ اور دیگر سیکیورٹی اداروں کے ساتھ مکمل رابطہ برقرار رکھا جا رہا ہے تاکہ صوبے میں امن و امان کی فضا کو ہر صورت برقرار رکھا جا سکے۔