پشاور سکول حادثہ: گورنر خیبرپختونخوا نے آج اہم اجلاس طلب کر لیا

پشاور کے علاقے دیر کالونی میں پرائیویٹ سکول کی چھت گرنے کے الم ناک حادثے پر گورنر خیبرپختونخوا نے صورتحال کا سنگین نوٹس لیتے ہوئے آج گورنر ہاؤس میں اہم اعلیٰ سطحی اجلاس طلب کر لیا ہے۔

ذرائع کے مطابق واقعے کی تحقیقات کے لیے قائم کی گئی 3 رکنی کمیٹی نے اپنی ابتدائی انکوائری رپورٹ مکمل کر لی ہے، جو آج اس اجلاس میں گورنر خیبرپختونخوا کو پیش کی جائے گی۔ اجلاس میں صوبائی سیکرٹری تعلیم، کمشنر پشاور، ڈپٹی کمشنر پشاور اور منیجنگ ڈائریکٹر (MD) پرائیویٹ سکولز ریگولیٹری اتھارٹی (PSRA) کو طلب کیا گیا ہے، جو گورنر کو تحقیقاتی پیش رفت اور ریسکیو اقدامات پر تفصیلی بریفنگ دیں گے۔

اجلاس میں انکوائری رپورٹ کی روشنی میں آئندہ ایسے حادثات کی روک تھام اور صوبے بھر کے نجی و سرکاری سکولوں میں طلبہ کے حفاظتی انتظامات اور بلڈنگ کوڈز کے نفاذ سے متعلق اہم فیصلوں کا امکان ہے۔