خیبر پختونخوا میں ایمرجنسی کے نفاذ یا گورنر راج پرغور، وزیراعظم ہاؤس میں کل اجلاس طلب

خیبر پختونخوا میں امن و امان کی بگاڑ اور سیکورٹی خدشات کے پیش نظر صوبے میں ایمرجنسی کے نفاذ یا گورنر راج جیسے سخت آئینی اقدامات پر غور و خوض کے لیے کل وزیراعظم ہاؤس میں اعلیٰ سطح کا ایک ہنگامی اجلاس طلب کر لیا گیا ہے۔ ذرائع کے مطابق اجلاس میں ملکی و صوبائی سلامتی کی موجودہ صورتحال، عوام کے تحفظ اور قومی سلامتی کے اداروں کی جانب سے فراہم کردہ حساس رپورٹس کا تفصیلی جائزہ لیا جائے گا۔

ذرائع نے انکشاف کیا ہے کہ اجلاس کے دوران سابق قبائلی اضلاع (سابق فاٹا) سمیت خیبر پختونخوا کے 12 حساس اضلاع میں ایمرجنسی نافذ کرنے کی تجویز پر بالخصوص غور متوقع ہے، تاکہ ان علاقوں میں امن و امان کی بحالی اور عوام کے تحفظ کے لیے مؤثر کارروائیاں کی جا سکیں۔ اس سلسلے میں آئینِ پاکستان کے آرٹیکلز 232، 233 اور 234 سمیت تمام متعلقہ آئینی شقوں کا قانونی جائزہ لیا جائے گا اور صوبے میں امن قائم کرنے کے لیے انتظامی اختیارات وفاقی حکومت کے سپرد کرنے سے متعلق تجاویز پر اہم فیصلے کیے جانے کا امکان ہے۔