گورنر کے پی کے فیصل کریم کنڈی کا کشمیریوں کی حمایت جاری رکھنے کا عزم

یومِ استحصالِ کشمیر کے موقع پر گورنر ہاؤس پشاور سے کشمیری عوام سے اظہارِ یکجہتی کے لیے ایک بڑی ریلی نکالی گئی، جس کی قیادت گورنر خیبر پختونخوا فیصل کریم کنڈی نے کی۔ ریلی میں شہریوں اور مختلف مکاتبِ فکر کے افراد نے بڑی تعداد میں شرکت کی، جبکہ شرکاء نے شہدائے کشمیر اور کشمیری عوام سے یکجہتی کے لیے 01 منٹ کی خاموشی اختیار کی۔ اس موقع پر اپنے خطاب میں گورنر خیبر پختونخوا فیصل کریم کنڈی نے کہا کہ آج پورا پاکستان اور دنیا بھر کے مسلمان اپنے کشمیری بھائیوں کے شانہ بشانہ کھڑے ہیں اور ان کی آزادی و حقِ خودارادیت کی کامل حمایت کرتے ہیں۔ انہوں نے مزید کہا کہ پاکستان ایک امن پسند ملک ہے جس نے علاقائی استحکام کے لیے ہمیشہ مثبت کردار ادا کیا ہے، اور جب بھی قومی مفاد و کشمیر کا معاملہ آتا ہے تو پوری قوم اور تمام سیاسی جماعتیں یکجا ہو جاتی ہیں۔ انہوں نے اس عزم کا اعادہ کیا کہ پاکستان کشمیریوں کی سیاسی، سفارتی اور اخلاقی حمایت جاری رکھے گا۔