گورنر کے پی کے کا پولیس کی تنخواہوں، شہداء پیکج میں اضافے کا اعلان

گورنر خیبر پختونخوا فیصل کریم کنڈی نے کے پی پولیس کے شہداء کے ورثاء اور اہلکاروں کی فلاح و بہبود کے لیے اہم اقدامات کا اعلان کرتے ہوئے پولیس ملازمین کی تنخواہوں، شہداء پیکج اور دیگر مراعات میں باضابطہ اضافے کا اعلان کیا ہے۔

گورنر ہاؤس پشاور میں منعقدہ ایک پروقار تقریب کے دوران 54 پولیس شہداء کے ورثاء میں پلاٹوں کے الاٹمنٹ لیٹرز تقسیم کیے گئے۔ اس موقع پر تقریب سے خطاب کرتے ہوئے گورنر فیصل کریم کنڈی کا کہنا تھا کہ دہشت گردی کے خلاف جنگ میں خیبر پختونخوا پولیس کی قربانیاں بے مثال ہیں، اس لیے کے پی پولیس کی تنخواہیں دیگر تمام صوبوں کے مقابلے میں زیادہ اور بہتر ہونی چاہئیں۔ انہوں نے محکمے میں نفری کی کمی کو پورا کرنے کے لیے خالی آسامیوں پر بھرتیوں کا عمل فوری طور پر تیز کرنے کی بھی ہدایت کی۔

گورنر خیبر پختونخوا نے دہشت گردی کے مختلف واقعات میں جامِ شہادت نوش کرنے والے پولیس اہلکاروں کے اہل خانہ کے لیے خصوصی مالی معاونت پیکج کے ساتھ ساتھ شہداء کی بیٹیوں کی شادی کے لیے خصوصی گرانٹ فراہم کرنے کا بھی اعلان کیا۔ اس موقع پر آئی جی خیبر پختونخوا ذوالفقار حمید، صوبائی چیف سیکرٹری، سینئر پولیس افسران، ایڈوائزری کونسل کے اراکین اور شہداء کے ورثاء کی بڑی تعداد موجود تھی۔