محکمہ تعلیم خیبرپختونخوا میں کروڑوں کی مالی بے ضابطگیاں سامنے آگئیں

خیبرپختونخوا میں پاکستان تحریک انصاف (پی ٹی آئی) کی مسلسل 13 سالہ حکومت کے بعد صوبے کا شعبہ تعلیم سنگین انتظامی و مالی بحران کا شکار ہو کر تباہی کے دہانے پر پہنچ گیا ہے، جس کے باعث لاکھوں طلبہ و طالبات کا تعلیمی مستقبل داؤ پر لگ گیا ہے۔

ذرائع کے مطابق آڈیٹر جنرل پاکستان کی مالی سال 2024-25ء کی رپورٹ میں خیبرپختونخوا کے محکمہ تعلیم میں 92 کروڑ روپے سے زائد کی مبینہ مالی بے ضابطگیوں کا انکشاف ہوا ہے۔ رپورٹ میں نشاندہی کی گئی ہے کہ اساتذہ کی نئی بھرتیوں اور طلبہ کو ٹیبلٹس کی فراہمی جیسے اہم منصوبوں میں 37 کروڑ 43 لاکھ روپے کی بے ضابطگیاں کی گئیں۔ اس کے علاوہ بنوں سے لے کر ہری پور تک متعدد سرکاری اسکولوں کی عمارتیں خستہ حالی کا شکار ہیں اور اسکولوں کی مرمت و بحالی کے لیے مختص فنڈز مبینہ کرپشن کی نذر ہو چکے ہیں۔

رپورٹ کے مطابق ڈیرہ اسماعیل خان، چارسدہ اور بونیر سمیت مختلف اضلاع میں درجنوں کلاس رومز کی حالت اتنی ابتر ہے کہ وہ مکمل طور پر ناقابلِ استعمال ہو چکے ہیں، جس سے ہزاروں بچوں کی باقاعدہ تعلیم شدید متاثر ہونے کا خدشہ پیدا ہو گیا ہے۔