فلڈ وارننگ سسٹم کی چوری : سیلاب کا خطرہ مزید بڑھ گیا

خیبر پختونخوا کے بالائی علاقوں میں سیلاب کی قبل از وقت اطلاع دینے کے لیے نصب کیے گئے ‘ارلی فلڈ وارننگ سسٹم’ کے اہم آلات کی چوری اور تخریب کاری کے واقعات سامنے آئے ہیں، جس نے ماہرینِ موسمیات کو شدید تشویش میں مبتلا کر دیا ہے۔ محکمہ موسمیات کے حکام کے مطابق، کمراٹ اور منیال سمیت مختلف وادیوں میں قائم متعدد مانیٹرنگ اسٹیشنوں نے سگنلز بھیجنا بند کر دیے ہیں، جس کے باعث گلیشیائی جھیلوں کے پھٹنے (GLOF) اور اچانک آنے والے تباہ کن سیلابوں کی بروقت پیشگوئی کا عمل بری طرح متاثر ہونے کا خدشہ پیدا ہو گیا ہے۔

 ریجنل میٹرولوجیکل سینٹر پشاور کے ڈپٹی ڈائریکٹر ڈاکٹر محمد فہیم نے بتایا کہ یہ جدید ترین نظام اقوام متحدہ (UN) کے تعاون اور گرین کلائمیٹ فنڈ کے تحت انتہائی حساس گلیشیائی علاقوں کی مسلسل نگرانی کے لیے نصب کیا گیا تھا۔ اس منصوبے کے تحت صوبے کی 8 مختلف وادیوں میں تقریباً 85 جدید ترین آلات لگائے گئے تھے، جن میں آٹومیٹک ویدر اسٹیشن، بارش ناپنے والے میٹر، واٹر لیول سینسرز اور دیگر حساس ڈیوائسز شامل تھیں۔ ماہرین کا کہنا ہے کہ ان قیمتی آلات کی چوری اور تباہی سے مقامی آبادی کو سیلاب کی صورت میں بروقت محفوظ مقامات پر منتقل کرنے میں شدید مشکلات کا سامنا کرنا پڑ سکتا ہے۔