صوابی میں ہمارا پلان سن کر مخالفین کے ہوش اڑ جائیں گے، سہیل آفریدی

مردان کے منگا بازار میں لانگ مارچ کے شرکا سے خطاب کرتے ہوئے خیبرپختونخوا کے وزیراعلیٰ محمد سہیل آفریدی نے اعلان کیا ہے کہ کل صوابی میں ان کا آئندہ کا لائحہ عمل سن کر مخالفین کے ہوش اڑ جائیں گے، اور اس بار جلسے میں عوام کی اتنی بڑی تعداد جمع ہو گی کہ کسی کو بھی طاقت یا گولی چلانے کی جرات نہیں ہوگی۔ انہوں نے کہا کہ آج مردان کے ہر کونے میں “دفعہ 804” نافذ ہے اور وہ تمام شرکا اور عوام کا تہہ دل سے شکریہ ادا کرتے ہیں۔

وزیراعلیٰ کے پی نے ملک بھر سے عوام کو اپیل کی کہ وہ اپنے پارلیمنٹیرینز کی قیادت میں کل ہر صورت صوابی پہنچیں، جہاں صوبائی حکومت ان کا بھرپور استقبال بھی کرے گی اور ان کے تحفظ کا خیال بھی رکھے گی۔ انہوں نے جوش دلاتے ہوئے کہا کہ عمران خان کے چاہنے والے اگر گاڑی میسر نہ ہو تو موٹر سائیکل، سائیکل یا حتیٰ کہ پیدل بھی صوابی پہنچیں، کیونکہ ایک ہزار بہادر ایک کروڑ بزدلوں پر بھاری ہوتے ہیں۔ انہوں نے واضح کیا کہ گورنر راج یا ایمرجنسی جیسے کسی بھی غیر آئینی و غیر قانونی ہتھکنڈے کو تسلیم نہیں کریں گے، گرفتاریاں ان کے حوصلے پست نہیں کر سکتیں اور ان کا پرامن مارچ پشاور سے ڈی چوک تک اپنے ہدف کی طرف بڑھتا رہے گا۔