وزیراعلیٰ کے پی نے لانگ مارچ کا اگلا لائحہ عمل دے دیا، 11 اکتوبر کو صوابی پہنچنے کا اعلان

خیبر پختونخوا کے وزیر اعلیٰ محمد سہیل آفریدی نے وفاقی حکومت کے خلاف جاری اپنے لانگ مارچ کا اگلا تحرک اور لائحہ عمل دیتے ہوئے اعلان کیا ہے کہ تمام احتجاجی قافلے 11 اکتوبر کو صوابی انٹرچینج پر جمع ہوں گے جہاں سے ہزارہ، پشاور، ملاکنڈ اور کوہاٹ ڈویژنز کے لیے آئندہ کی حکمتِ عملی کا باقاعدہ اعلان کیا جائے گا۔ شبقدر چوک چارسدہ میں لانگ مارچ کے مظاہرین اور شرکا سے دھواں دار خطاب کرتے ہوئے وزیراعلیٰ سہیل آفریدی نے وفاقی حکومت، معاشی پالیسیوں اور رجیم چینج آپریشن کو سخت تنقید کا نشانہ بنایا۔

وزیراعلیٰ خیبرپختونخوا نے الزام عائد کیا کہ بند کمروں میں کیے جانے والے غیر آئینی فیصلوں نے ملک کی معیشت، قانون کی حکمرانی اور ترقی کے سفر کو تباہ کر دیا ہے۔ انہوں نے اعداد و شمار کا حوالہ دیتے ہوئے کہا کہ ملک میں غربت کی شرح 48 فیصد اور مہنگائی 80 فیصد تک پہنچ چکی ہے، جبکہ ورلڈ رول آف لا انڈیکس میں پاکستان 143 ممالک میں سے 130 ویں نمبر پر گر چکا ہے۔ فوجی آپریشنز اور سیکیورٹی پالیسیوں پر بات کرتے ہوئے انہوں نے کہا کہ 2004 سے 2026 تک ہزاروں انٹیلی جنس بیسڈ آپریشنز کے باوجود بدامنی کا خاتمہ نہیں ہو سکا کیونکہ طاقت کے استعمال سے زیادہ سویلین اختیارات کی بحالی اور درست پالیسی سازی کی ضرورت ہے۔ انہوں نے خیبرپختونخوا کے این ایف سی ایوارڈ اور صوبائی فنڈز کے 5 ہزار ارب روپے سے زائد کے بقایا جات کی فوری ادائیگی کا بھی مطالبہ کیا۔