وزیر اعلیٰ کے پی سہیل آفریدی کو اشتہاری قرار دینے کی کارروائی کا آغاز

اسلام آباد: انسدادِ دہشتگردی عدالت (اے ٹی سی) نے وزیر اعلیٰ خیبر پختونخوا (کے پی) سہیل آفریدی کو اشتہاری قرار دینے کی کارروائی کا باضابطہ آغاز کر دیا ہے۔ اسلام آباد کی اے ٹی سی میں وزیر اعلیٰ کے علاوہ صوبائی وزیر مینا آفریدی، شفیع اللہ آفریدی اور دیگر ملزمان کے خلاف بھی یہ کارروائی شروع کی گئی ہے۔

اے ٹی سی کے جج ابوالحسنات ذوالقرنین نے اس مقدمے کی سماعت کی، جو ملزمان کے خلاف 26 نومبر کے احتجاج کے بعد تھانہ رمنا میں درج کیا گیا تھا۔ عدالت نے متعدد بار طلبی کے نوٹس جاری کیے تھے، مگر ملزمان کے مسلسل پیش نہ ہونے کے باعث انہیں اشتہاری قرار دینے کی قانونی کارروائی شروع کر دی گئی ہے۔

یاد رہے کہ انسدادِ دہشتگردی عدالت اس سے قبل بھی وزیر اعلیٰ خیبر پختونخوا اور دیگر کے خلاف تھانہ نون میں درج ایک اور مقدمے میں اسی طرح کی اشتہاری کارروائی کا آغاز کر چکی ہے۔