سہیل آفریدی کا صحافیوں کیلئے انڈوومنٹ فنڈ قائم کرنے پر اتفاق

وزیراعلیٰ خیبرپختونخوا نے پشاور پریس کلب کی نئی عمارت کا جلد سنگِ بنیاد رکھنے اور صحافیوں کے لیے الگ انڈوومنٹ فنڈ کے قیام کی اصولی منظوری دیتے ہوئے ان کی فلاح و بہبود کے لیے متعدد بڑے اقدامات کا اعلان کیا ہے۔ حکومت نے مالی سال 2026-27 کے بجٹ میں کارکن صحافیوں کو بلاسود قرضوں کی فراہمی کے لیے 1 ارب روپے، میڈیا کالونیز کے لیے 50 کروڑ روپے، پشاور پریس کلب کی نئی عمارت کے لیے 15 کروڑ روپے، اور صوبائی پریس کلبوں کی بحالی کے لیے 30 کروڑ روپے مختص کیے ہیں۔ اس کے علاوہ، جرنلسٹس ویلفیئر انڈوومنٹ فنڈ کو 20 کروڑ سے بڑھا کر 50 کروڑ روپے کر دیا گیا ہے۔ وزیراعلیٰ نے واشگاف الفاظ میں کہا کہ میڈیا اداروں کو سرکاری اشتہارات کے بقایا جات کی ادائیگی کارکن صحافیوں کے واجبات اور کم از کم اجرت کی ادائیگی سے مشروط ہوگی تاکہ ان کے حالاتِ کار کو بہتر بنایا جا سکے۔ انہوں نے نیو پشاور ویلی سٹی میڈیا انکلیو منصوبے پر صحافیوں کو اعتماد میں لینے اور ان کے لیے مطالعاتی دوروں کے انعقاد کی ہدایت بھی جاری کی ہے۔