ڈی چوک سے آزادی لے کر ہی لوٹیں گے یا کفن میں واپس آئیں گے، وزیراعلیٰ خیبر پختونخوا

کوہاٹ: وزیراعلیٰ خیبر پختونخوا سہیل خان آفریدی نے کہا ہے کہ اس بار ڈی چوک کا رخ کیا تو آزادی لے کر واپس آئیں گے یا کفن میں۔

کوہاٹ میں جلسہ عام سے خطاب کرتے ہوئے وزیراعلیٰ نے کہا کہ بانی چیئرمین کو دبانے کی منظم کوشش کی جارہی ہے، جج سے ملاقات کی اجازت دی جاتی ہے مگر اہلِ خانہ اور رہنماؤں کو روکا جاتا ہے۔ انہوں نے الزام لگایا کہ جن اداروں پر مینڈیٹ کے تحفظ کی ذمہ داری تھی وہی ڈاکہ ڈال رہے ہیں اور محافظ قاتل بنے ہوئے ہیں۔

سہیل آفریدی کا کہنا تھا کہ کچھ عناصر راتوں رات میڈیا پر بیٹھ کر دھمکیاں دیتے ہیں، تاہم عمران خان نے احتجاج اور مذاکرات کی ذمہ داری محمود خان اچکزئی اور علامہ راجہ ناصر عباس کو سونپی ہے، اور جب بھی کال آئے گی کارکنان کو تیار رہنا ہوگا۔

انہوں نے کہا کہ حقیقی آزادی ہمیں خود متحد ہو کر حاصل کرنا ہوگی۔ ان کے مطابق وفاقی حکومت نے ہزاروں ارب روپے کی کرپشن کی، ملکی قرضہ 80 ہزار ارب روپے تک پہنچ چکا ہے اور جنہوں نے ملک کو قرضوں میں ڈبویا وہی آج گورننس کے مشورے دے رہے ہیں۔

سہیل آفریدی نے وزیراعلیٰ پنجاب پر بھی تنقید کرتے ہوئے کہا کہ پنجاب میں سرمایہ کاری کم ہو رہی ہے جبکہ خیبر پختونخوا میں سرمایہ کاری بڑھ رہی ہے، اس کے باوجود تنقید کا رخ ہماری طرف ہے۔