سپیکر خیبر پختونخوا کا اہم اقدام، پولیس سے اہم ریکارڈ طلب کر لیا

اسپیکر خیبر پختونخوا اسمبلی بابر سلیم سواتی نے صوبائی ارکانِ اسمبلی، وزراء اور دیگر اہم پارلیمانی عہدیداروں سے متعلق پولیس کی جانب سے کی جانے والی تمام کارروائیوں کا مکمل ریکارڈ طلب کر لیا ہے۔ اس سلسلے میں صوبائی اسمبلی سیکرٹریٹ نے انسپکٹر جنرل (آئی جی) خیبر پختونخوا پولیس کو ایک رسمی مراسلہ ارسال کیا ہے، جس میں گزشتہ دو ہفتوں کے دوران ارکانِ اسمبلی، صوبائی وزراء، مشیران، معاونینِ خصوصی اور پارلیمانی سیکرٹریز سے پیش آنے والے تمام واقعات کی تفصیلی معلومات فراہم کرنے کی ہدایت کی گئی ہے۔

اسمبلی سیکرٹریٹ کی جانب سے بھیجے گئے مراسلے میں متعلقہ پارلیمنٹیریئنز کی گرفتاری، حراست، ان کی رہائش گاہوں پر مارے گئے چھاپوں، حملوں اور تلاشی کی کارروائیوں کا مکمل ریکارڈ مانگا گیا ہے۔ اس کے علاوہ پولیس اسٹیشنز میں درج رپورٹس، درج شدہ ایف آئی آرز اور واقعات کی اطلاع دینے والے افراد کی تفصیلا ت بھی طلب کی گئی ہیں۔ مراسلے میں واضح کیا گیا ہے کہ مطلوبہ معلومات آئینِ پاکستان کے آرٹیکلز 66، 67 اور 127 کے علاوہ خیبر پختونخوا اسمبلی کے قواعد و ضوابط اور صوبائی اسمبلی اختیارات، استحقاقات و مراعات ایکٹ کے تحت منگوائی گئی ہیں تاکہ تمام ریکارڈ فوری طور پر اسپیکر کے سامنے پیش کیا جا سکے