خیبر پختونخوا کے 12 اضلاع میں علاقائی ترقیاتی کونسل کے ارکان کے انتخاب کا آغاز

خیبر پختونخوا کے 12 اہم اضلاع میں نئے انتظامی فریم ورک کے تحت علاقائی ترقیاتی کونسل (Regional Development Council) کے ارکان کے انتخاب کا عمل باقاعدہ طور پر شروع ہو گیا ہے۔

پہلے مرحلے میں 14 اکتوبر کو شمالی وزیرستان، خیبر، بنوں اور ٹل (کرم) میں روایتی جرگوں کے ذریعے مشاورتی عمل کا آغاز کر دیا گیا ہے، جبکہ دیگر متعلقہ اضلاع میں بھی یہ عمل آئندہ دو روز کے دوران مکمل کیا جائے گا۔ اس نئے انتظامی و ترقیاتی نظام کے تحت باجوڑ، مہمند، خیبر، کرم، اورکزئی، شمالی وزیرستان، جنوبی وزیرستان اپر، جنوبی وزیرستان لوئر، ڈیرہ اسماعیل خان، ٹانک، لکی مروت اور بنوں کے عوام مقامی جرگہ نظام کی مدد سے کونسل کے ارکان کا انتخاب کریں گے۔ انتخاب مکمل ہونے کے بعد ہر ضلع سے دو قبائلی عمائدین یا ملک شامل ہوں گے، جس کے بعد 24 ارکان پر مشتمل 12 اضلاع کی مشترکہ علاقائی ترقیاتی کونسل قائم ہو گی۔

ضلعی انتظامیہ اور ڈپٹی کمشنرز کی زیرِ نگرانی منعقد ہونے والے ان جرگوں میں ملک و مشران، علماء کرام اور تاجر برادری نے شرکت کی اور امن و امان کی صورتحال، سیکیورٹی اور ترقیاتی ضروریات پر تفصیلی غور کیا۔ قبائلی عمائدین نے اس نظام پر اعتماد کا اظہار کرتے ہوئے سرکاری اداروں اور سیکیورٹی فورسز کے ساتھ مکمل تعاون کا اعادہ کیا۔ اس کونسل کا بنیادی مقصد مقامی برادریوں کو فیصلوں میں شامل کرنا اور علاقے کے مسائل و ترقیاتی ترجیحات کو مؤثر انداز میں حل کرنا ہے۔