خیبرپختونخوا میں ممکنہ ایمرجنسی نافذ کرنے پر غور، افسران کو تیار رہنے کی ہدایت

خیبر پختونخوا کے 12 حساس اضلاع (بشمول سابق قبائلی اضلاع) میں ممکنہ ایمرجنسی کے نفاذ کی تجویز پر اہم پیش رفت سامنے آئی ہے۔ حکومتی ذرائع کے مطابق ان اضلاع میں تعینات اعلیٰ بیوروکریٹس اور انتظامی افسران کو کسی بھی ہنگامی اقدام سے نپٹنے کے لیے الرٹ رہنے اور پیشگی تیاریاں مکمل رکھنے کی ہدایت کر دی گئی ہے۔

ذرائع کا کہنا ہے کہ آئینی آرٹیکلز کے تحت ان 12 اضلاع میں ایمرجنسی نافذ ہونے کی صورت میں مقامی انتظام و انصرام مکمل طور پر بیوروکریسی کے سپرد کیا جا سکتا ہے اور سرکاری افسران کو بطور “ایڈمنسٹریٹر” نامزد کیے جانے کا قوی امکان ہے۔ یہ ایڈمنسٹریٹرز متعلقہ اضلاع میں امن و امان کی بحالی، انتظامی امور کی نگرانی اور تمام سرکاری محکموں کی ورکنگ کو براہ راست کنٹرول کریں گے۔ اس اہم آئینی و انتظامی معاملے کے حتمی خد و خال پر غور و خوض کے لیے اسلام آباد میں وزیراعظم ہاؤس کی سطح پر ہنگامی اجلاس منعقد ہو رہا ہے، جس میں سیکیورٹی اور انتظامی امور کا جائزہ لے کر حتمی منظوری دی جائے گی۔