خیبرپختونخوا :انفلوئنزا وائرس پھیلنے کا خطرہ،محکمہ صحت کی ہنگامی ایڈوائزری جاری

پشاور: خیبرپختونخوا میں نومبر سے اپریل تک انفلوئنزا (فلو) وائرس کے پھیلنے کا خطرہ بڑھ گیا ہے۔ محکمہ صحت نے نیشنل انسٹی ٹیوٹ آف ہیلتھ سائنس اسلام آباد کی سفارشات پر ہنگامی ایڈوائزری جاری کردی۔

محکمہ صحت کے مطابق ایڈوائزری میں فلو سے بچاؤ، کنٹرول اور علاج کے حوالے سے جامع ہدایات دی گئی ہیں۔ رپورٹ کے مطابق فلو کے کیسز میں نومبر سے اپریل تک اضافہ متوقع ہے، جبکہ جاپان، سنگاپور اور تھائی لینڈ میں کیسز پہلے ہی بڑھ چکے ہیں۔

ایڈوائزری میں 65 سال سے زائد عمر کے افراد، 5 سال سے کم عمر بچوں، حاملہ خواتین اور مختلف بیماریوں میں مبتلا مریضوں کو خصوصی احتیاط برتنے کی ہدایت کی گئی ہے۔

محکمہ صحت نے کہا ہے کہ انفلوئنزا سے بچاؤ کی ویکسین لگوانا سب سے مؤثر حفاظتی اقدام ہے، جبکہ ہاتھوں کی صفائی اور ماسک کا استعمال بیماری کے پھیلاؤ کو روکنے میں مددگار ثابت ہوسکتا ہے