بہاولنگر: دیرینہ تلخ کلامی پر داماد کے ہاتھوں ساس قتل، سالی شدید زخمی

کھچی والا کے نواحی علاقے میں گھریلو ناچاقی اور دیرینہ تلخ کلامی پر داماد نے مبینہ طور پر چھریوں کے وار کر کے اپنی ساس کو بیدردی سے قتل جبکہ سالی کو شدید زخمی کر دیا۔

پولیس ذرائع کے مطابق افسوسناک واقعہ اس وقت پیش آیا جب مقتولہ خاتون گھر میں سوئی ہوئی تھی۔ ملزم نے اچانک تیز دھار آلے (چھری) سے ساس پر حملہ کر دیا۔ اس دوران ماں کو بچانے کے لیے آنے والی بیٹی پر بھی ملزم نے پے در پے وار کیے، جس سے وہ شدید زخمی ہو گئی۔ دونوں متاثرہ خواتین کو فوری طور پر طبی امداد کے لیے ہسپتال منتقل کیا گیا جہاں زخموں کی تاب نہ لاتے ہوئے ساس دم توڑ گئی، جبکہ سالی کی حالت تشویشناک بتائی جاتی ہے۔

پولیس نے مقتولہ خاتون کی شناخت رانی بی بی اور زخمی لڑکی کی شناخت نزیراں بی بی کے نام سے کی ہے۔ واقعے کی اطلاع ملتے ہی مقامی پولیس اور کرائم سین ٹیم نے موقع پر پہنچ کر شواہد اکٹھے کیے اور لاش کو پوسٹ مارٹم کے لیے منتقل کر دیا۔ پولیس حکام کا کہنا ہے کہ واردات کے بعد ملزم موقع سے فرار ہونے میں کامیاب ہو گیا جس کی گرفتاری کے لیے چھاپے مارے جا رہے ہیں اور جلد ہی اسے قانون کے کٹہرے میں لایا جائے گا۔