خواجہ آصف کی نریندر مودی کو دیئے گئے اعزاز پر تنقید

وفاقی وزیر دفاع خواجہ محمد آصف نے بھارتی وزیرِ اعظم نریندر مودی کو ملنے والے غیر ملکی اعزازات پر شدید تنقید کرتے ہوئے اسے تاریخ کی سب سے زیادہ شرمناک کہانی قرار دے دیا ہے۔

سماجی رابطے کی ویب سائٹ ‘ایکس’ (سابقہ ٹویٹر) پر جاری اپنے ایک بیان میں وزیر دفاع خواجہ آصف کا کہنا تھا کہ مودی کی آمد سے محض چند روز قبل ہی یہ ایوارڈز تخلیق کیے گئے، اور ان کے سرٹیفکیٹس کسی سستے مصنوعی ذہانت (AI) ماڈل کے ذریعے تیار کیے گئے تھے۔ انہوں نے دعویٰ کیا کہ ان سرکاری سرٹیفکیٹس میں املا (Spellings) کی واضح غلطیاں موجود تھیں اور نریندر مودی اس اعزاز کو حاصل کرنے والے دنیا کے پہلے اور واحد فرد بن گئے۔

خواجہ آصف نے مودی کے اعزازات کی حقیقت پر سوال اٹھاتے ہوئے کہا کہ یہ منصوبہ بند “اعزاز” یا تو سستی قسم کی مقبولیت حاصل کرنے کی بدترین کوشش ہے یا پھر بین الاقوامی سطح پر خوشامد کی انتہائی مذموم شکل ہے۔

وزیر دفاع نے اپنے بیان کے آخر میں سخت الفاظ استعمال کرتے ہوئے کہا کہ نریندر مودی اپنی ان حرکتوں سے پوری بھارتی قوم کو عالمی سطح پر شرمندگی سے دوچار کر رہے ہیں اور وہ اب خود اپنی قوم کے لیے باعثِ شرمندگی بن چکے ہیں۔