اسلام آباد سومنات نہ جنید اکبر ہی محمود غزنوی، وفاق اپنا دفاع کرے گا: خواجہ آصف

وفاقی وزیرِ دفاع خواجہ آصف نے پی ٹی آئی رہنما جنید اکبر کے متنازع بیان پر سخت ردِعمل دیتے ہوئے کہا ہے کہ نہ اسلام آباد سومنات ہے اور نہ یہ شخص محمود غزنوی ہے۔ سماجی رابطے کی ویب سائٹ ایکس (X) پر جاری اپنے بیان میں خواجہ آصف نے کہا کہ اسلام آباد پاکستان کا دارالحکومت، اسلام کا قلعہ اور وفاق کی علامت ہے، اور جنید اکبر کی زبان بتا رہی ہے کہ یہ لوگ اقتدار کے حصول کے لیے کس حد تک جا سکتے ہیں اور ان کے دل میں ملک کا کتنا احترام ہے۔

وزیرِ دفاع نے سوال اٹھایا کہ خیبر پختونخوا میں روزانہ بہنے والے خون اور کے پی پولیس کی شہادتوں پر ان کا دل کیوں نہیں روتا؟ انہوں نے 27 ستمبر کے ممکنہ احتجاج پر تشویش کا اظہار کرتے ہوئے پوچھا کہ کیا یہ حملہ طالبان کا ہوگا یا پاکستان میں مقیم افغان باشندے اس کا حصہ ہوں گے؟ خواجہ آصف نے واضح کیا کہ وفاق پوری قوت کے ساتھ اپنے دارالحکومت کا دفاع کرے گا۔ انہوں نے مزید کہا کہ بانی پی ٹی آئی اور ان کے حواری اقتدار کے لیے کسی بھی حد تک جا سکتے ہیں جیسا کہ 9 مئی اور 26 نومبر کو دیکھا گیا، تاہم اپنے بیان سے مکرنے پر انہوں نے طنز کرتے ہوئے کہا کہ 24 گھنٹے بھی نہیں گزرے اور یہ دوڑ لگا کر وضاحتیں دینے لگے ہیں۔