18ویں ترمیم کے اختیارات نچلی سطح پر منتقل کیے جائیں :خالد مقبول صدیقی

متحدہ قومی موومنٹ (ایم کیو ایم) پاکستان کے رہنما خالد مقبول صدیقی نے کراچی میں ایک ریلی کے شرکاء سے خطاب کرتے ہوئے مطالبہ کیا ہے کہ 18ویں ترمیم کے تحت صوبوں کو منتقل ہونے والے اختیارات اور وسائل نچلی سطح پر مقامی حکومتوں اور عوام تک منتقل کیے جائیں۔ انہوں نے کہا کہ ملک میں قائم تمام انتظامی یونٹس لسانی بنیادوں کے بجائے محض انتظامی بنیادوں پر تشکیل دیے جانے چاہئیں تاکہ جمہوریت کے حقیقی ثمرات بلا تفریق عام شہری تک پہنچ سکیں۔

خالد مقبول صدیقی نے ریلی کے جمِ غفیر سے گفتگو کرتے ہوئے کہا کہ ایم کیو ایم سیاست کو عبادت سمجھ کر کرتی ہے اور آج شہرِ قائد کے شہریوں نے ایک نیا جمہوری سفر شروع کر دیا ہے۔ انہوں نے عدالتی نظام میں انصاف کی عدم فراہمی اور معاشرے میں خواتین کے حقوق، بالخصوص کاروکاری جیسے بھیانک مسائل پر بھی تشویش کا اظہار کیا۔ انہوں نے اعلان کیا کہ نیو کراچی اور اورنگی ٹاؤن کی ریلیوں کی کامیا بی کے بعد اب ایک اور بڑی ریلی نکالی جائے گی جس کا رخ جلد طے کیا جائے گا۔