بانی پی ٹی آئی کو قیدی تنہائی میں رکھنا غیر آئینی اور انسانی حقوق کی خلاف ورزی ہے: علیمہ خان

راولپنڈی کے علاقے گورکھپور فیکٹری ناکے پر میڈیا سے گفتگو کرتے ہوئے علیمہ خان نے کہا ہے کہ بانی پاکستان تحریک انصاف کو مسلسل قیدی تنہائی میں رکھا جا رہا ہے جو غیر قانونی، غیر آئینی اور انسانی حقوق کی کھلی خلاف ورزی ہے۔ انہوں نے کہا کہ اسی غیر انسانی سلوک کے خلاف وہ احتجاج اور دھرنے پر بیٹھی ہیں۔

علیمہ خان کا کہنا تھا کہ ہم یہاں کوئی قانون نہیں توڑ رہے اور نہ ہی کوئی خلافِ آئین اقدام کر رہے ہیں، بلکہ وہ لوگ ملکی اور عالمی قوانین کی خلاف ورزی کر رہے ہیں جنہوں نے بانی پی ٹی آئی کو قیدِ تنہائی میں رکھا ہوا ہے۔ انہوں نے کہا کہ کسی شخص کو پانچ دن قیدی تنہائی میں رکھنا بھی انسانی حقوق کی بنیادی خلاف ورزی ہے، جبکہ بانی پی ٹی آئی کو دو ماہ سے زائد عرصے سے قید تنہائی میں رکھا گیا ہے۔

انہوں نے بتایا کہ اس دوران ان کی بہن کی بانی پی ٹی آئی سے صرف مختصر ملاقات ہوئی، وہ بھی بیس بیس منٹ کے لیے۔ علیمہ خان نے کہا کہ حکام اس قدر خوف زدہ ہیں کہ سمجھتے ہیں بانی پی ٹی آئی کو بند کر دینے سے عوام انہیں بھول جائیں گے، لیکن نہ ہم انہیں بھولیں گے اور نہ ہی عوام کو بھولنے دیں گے۔ ان کا کہنا تھا کہ بانی پی ٹی آئی کو قید میں رکھنے کا مقصد صرف یہ ہے کہ ان کا پیغام باہر نہ آ سکے۔

علیمہ خان نے واضح کیا کہ جب تک بانی پی ٹی آئی سے ملاقات نہیں کروائی جاتی، وہ یہاں موجود رہیں گی۔ انہوں نے کہا کہ ہمیں اطلاع ملی ہے کہ واٹر کینن اور دو بوزر بھی منگوائے گئے ہیں، اگر پانی پھینکا گیا تو ہم بھیگ جائیں گے، زخمی ہوں گے یا چوٹیں آئیں گی، لیکن ہم پیچھے نہیں ہٹیں گے۔

انہوں نے مزید کہا کہ آج ہم مکمل تیاری کے ساتھ آئے ہیں، اضافی گرم کپڑے، رین کوٹس اور دیگر سامان موجود ہے۔ علیمہ خان نے کہا کہ پانی پھینکیں، شیل ماریں یا کچھ اور کریں، ہم بانی پی ٹی آئی کے ساتھ کھڑے ہیں، جان بھی دے دیں گے مگر پیچھے نہیں ہٹیں گے۔