کراچی میں ٹریفک حادثات کے خلاف جماعت اسلامی کا احتجاجی لائحہ عمل، شہر بھر میں دھرنوں کا اعلان

کراچی میں بڑھتے ہوئے ٹریفک حادثات کے خلاف جماعت اسلامی کراچی کی جانب سے نمائش چورنگی پر احتجاجی دھرنا دیا گیا، جس میں شہریوں کی بڑی تعداد نے شرکت کی۔

دھرنے سے خطاب کرتے ہوئے امیر جماعت اسلامی کراچی منعم ظفر خان نے کہا کہ ٹریفک حادثات میں قیمتی انسانی جانوں کے ضیاع اور اسٹریٹ کرائم کے بڑھتے واقعات پر پولیس اور صوبائی حکومت خاموش تماشائی بنی ہوئی ہے۔ انہوں نے سوال اٹھایا کہ ہیوی ٹریفک سے ہونے والے حادثات پر اربابِ اختیار کیوں خاموش ہیں۔

منعم ظفر کا کہنا تھا کہ پیپلز پارٹی کی صوبائی حکومت اور میئر کراچی شہریوں کو ان کا جائز حق دینے کے لیے تیار نہیں، جس کے باعث کراچی مسلسل بدانتظامی کا شکار ہے۔

انہوں نے اعلان کیا کہ جماعت اسلامی ’’حق دو کراچی تحریک‘‘ کے اگلے مرحلے کا آغاز کر رہی ہے، جس کے تحت شہر میں موجود ظلم کے نظام کے خلاف مختلف مقامات پر دھرنے دیے جائیں گے۔

امیر جماعت اسلامی کراچی نے واضح کیا کہ شاہراہ فیصل، شاہراہ اورنگی اور شاہراہ کورنگی سمیت شہر کی اہم شاہراہوں پر احتجاجی دھرنے دیے جائیں گے۔ ان کا مطالبہ تھا کہ ہیوی ٹریفک کو متبادل راستوں پر منتقل کیا جائے تاکہ شہریوں کی جانوں کا تحفظ یقینی بنایا جا سکے۔